БИДНИЙ ТУХАЙ

Үүл Гэр - Эерэг агуулгатай зурагт мэдээ, мэдлэг

ДЭМЖИХ

ҮҮЛЭН ГЭРТ ТАВТАЙ МОРИЛ!

Сайн уу? 🌞

Саяхан даа, би амралтын өдрийн өглөө эртлэн босоод тогтуун тайван гэгч нь утсаа нээн, фэйсбүүк орсон юм. Гэтэл нэг сэтгэлд тавгүй мэдээ гүйлгэн уншаад л зүрхний хэм хурдсаж, стресстэж, сэтгэлээр унаж орхилоо. Амархан хямарч, юмсыг ургуулан боддог хүн гэж өөрийгөө бодсон ч эргэн тойрны хүрээллээсээ ч нийгмийн сөрөг мэдээллийн урсгал ямар их буйг байнга анзаардаг билээ. Та ч бас ойрын үед, магадгүй өнөөдөр яг ийм мэдрэмж мэдэрсэн байх.

Цахим орчноор хальтхан шагаймагц айдас, стресс, бухимдал төрүүлсэн сөрөг таагүй мэдээ, эсвэл төөрөгдүүлсэн мэдээлэл биднийг бүчин авдаг. Нийгмийн хүнд хэцүү сэдвийг хэвлэн мэдээлж, арга шийдэл эрэлхийлж, бодит үнэнийг хүргэх нь сэтгүүл зүйн эрхэм хариуцлага. Иргэний үүргээ биелүүлэн бодит санал, шүүмжээ илэрхийлэх нь ч зүйтэй. Гэвч асар хурдтай өрнөх мэдээллийн тэрхүү урсгал дунд ЭЕРЭГ, ЗӨВ САЙХАН, ГЭРЭЛ ГЭГЭЭТЭЙ нь чимээгүйхэн орхигдон мартагдан өнгөрч буй нь харамсалтай.

Тиймээс эерэг агуулгатай зурагт мэдээ, мэдлэгийн талбар бүтээн, сайн сайхан бүхнийг хуран цуглуулж, амгалан дулаахан гэр мэт орон зайд зураглан хүргэхийг хүссэн билээ.

"Үүл Гэр" нь эерэг агуулга, хүний сайн сайхан, оюун сэтгэлээ танин мэдэхүй, хайрлахуйд чиглэсэн бие даасан, хараат бус мэдээ, мэдлэгийн талбар юм. Мэдээллийг айдас, бухимдлын эх үүсвэр биш, мэдлэг ойлголт, итгэл найдвар, сайн сайханд чиглэсэн хүний оюуны хөгжлийн хэрэгсэл болгоцгооё!

Хэзээд нээлттэй, халуун цайтай байдаг нүүдэлчин айлын дулаахан гэр шиг айдасгүй, амгалан дулаан орон зайд буйгаар та төсөөлөөрэй. Бас гадаа бороо орж байвал хэчнээн гоё!

- "Үүл Гэр" төслийн санаачлагч, сэтгүүлч, зураач Г.Сүрэн

БУЛАН

ДУЛААХАН МЭДЭЭ

Монгол орны хаа нэгтээ, олны нүднээс далдхан боловч гэрэл гэгээ түгээж буй эерэг дулаахан үйл явдал, мэдээ мэдээллийг “Дулаан мэдээ” буландаа багцлан хүргэж байна.